Giaprubahan ni Pang. Ferdinand R. Marcos Jr. ang deklarasyon sa state of national calamity tungod sa dako nga kadaot nga gidala sa Bagyong Tino kon (Kalmaegi) ug isip pagpangandam sa hulga sa posibleng super typhoon Uwan.
Sumala ni Marcos, kapin sa 10 ka rehiyon na ang naapektuhan o posibleng maapektuhan sa sunod-sunod nga mga bagyo.
Human giigo sa Visayas ug Mindanao sa Bagyong Tino nga nagdala og kusog nga ulan ug hangin, libuan ka pamilya ang nawadan og puy-anan, daghang mga lungsod ang nalunupan, ug daghang landslide ang natala.
Subay sa labing bag-ong datos sa gobyerno, 140 na ang namatay tungod sa pag-igo sa bagyo.
Ang deklarasyon nagtumong aron paspasan ang relief, rehabilitation, ug recovery efforts sa mga apektadong lugar, lakip na ang paspas nga access sa calamity funds, price control sa mga nag-unang produkto, ug paspas nga pagpadala sa national assistance.
Samtang, sumala sa weather bureau, usa ka tropical depression nga naa pa sa gawas sa Philippine Area of Responsibility (PAR) ang gipaabot nga moigo sa Cagayan sa unang bahin sa sunod semana.
Kung mosulod na kini sa PAR, paganganlan kini og Bagyong Uwan, ang ika-21 nga bagyo karong tuiga,nga adunay posibilidad nga mahimong super typhoon.
Samtang gipasalig usab ni Marcos nga ang gobyerno anaa sa “full swing” sa mga operasyon sa Visayas samtang dungan nga nag-andam sa pag-abot ni Uwan sa Northern Luzon.
Matod niya, padayon ang deployment sa national teams, military, ug kapulisan aron maghatod og tabang, mag-ayo sa kuryente ug komunikasyon, ug maglimpyo sa mga dalan nga nababagan sa mga debris tungod sa baha ug landslide.
Gitakda usab nga mobisita si Pang. Marcos Jr.sa Cebu karong adlawa aron personal nga mag-inspeksyon ug manghatag og tabang sa mga biktima sa Bagyong Tino.
