Gilikayan ni Defense Secretary Gilbert Teodoro ang pakigpulong sa iyang Chinese counterpart atol sa 19th ASEAN Defense Ministers’ Meeting (ADMM) didto sa Malaysia, human ipasangil sa China nga nagapang “blackmail” matod pa ang Pilipinas batok sa ilang gobyerno.
Gipasabot ni Teodoro nga usa ka adlaw pa lang sa wala pa ang miting, nagpagawas na og pahayag ang Chinese Defense Ministry nga nag-ingon nga kinahanglan matod pa sa Pilipinas nga “mend its ways or suffer the consequences.”
“Tubaga kuno na, kung ikaw, makigpulong ba ka sa usa ka nasod nga gipaubos ug gipahimangnoan pa nimo? Syempre dili,” matud ni Teodoro, nga nagpakita sa iyang baruganan batok sa insulto nga gipakanaog sa nasod.
Gidugang pa sa kalihim nga iyang gisunod ang panawagan ni Chinese President Xi Jinping sa APEC Summit nga “resist unilateral bullying” usa ka ironic nga pamulong, matud pa niya, kon tan-awon ang lihok sa China batok sa Pilipinas sa West Philippine Sea.
Samtang nagpadayon ang tensyon, nakigkita si Pangulong Ferdinand Marcos Jr. kang Xi Jinping sa kilid sa APEC Summit aron ipakita ang ginatawag nga “partnership and meaningful cooperation” sa duha ka nasod, apan wala gihapon klaro kung unsa ang kahulugan niini sa tinuod nga kahimtang sa relasyon sa duha ka panig.
