Kapin sa 30 ka tawo ang nasamdan human mibuto ang kagubot atol sa rally sa Ayala Bridge, Domingo sa hapon, Setyembre 21, 2025.
Nagsugod ang tensiyon dihang pipila ka nakamaskara nga batan-on ang nagsiga og ligid sa sakyanan ug nanghagbong og bato, botelya, ug pintura batok sa kapulisan nga nagbarikada.
Human niini, nabungkag ang harang ug nakalusot ang mga raliyista padulong sa Mendiola, diin nasunog ang usa ka motorsiklo ug naguba ang salamin sa payloader duol sa usa ka unibersidad.
Usa usab ka kusog nga pagbuto ang nadungog, apan hangtod karon wala pa masuta ang hinungdan niini.
Duha ang nadakpan samtang kapin sa napulo ka nakaitom nga raliyista ang gipadapa ug gibantayan sa kapulisan.
Samtang gilayon usab nga naapula sa mga bombero ang kalayo.
Sa ulahing bahin, gipadayon sa otoridad ang imbestigasyon ilabi na sa gi-report nga kemikal nga miigo sa pipila ka pulis.
