Gisiguro na kagahapong adlawa ang pag-ilis sa liderato sa Kamara de Representantes human opisyal nga napili si Deputy Speaker Faustino “Bojie” Dy sa ika-unom nga Distrito sa Isabela isip bag-ong House Speaker, diin giilisan si Speaker Ferdinand Martin Romualdez.
Ang maong desisyon misunod sa daghang hungihong nga milutaw sulod sa mga miaging semana, ug karon gisilyohan na sa pormal nga pagpili sa mga kongresista.
Si Dy, nga dugay nang nagserbisyo isip lider sa Isabela, gilauman nga magdala og bag-ong direksyon sa Kamara, ilabi na sa pagsuporta sa mga inisyatibo sa administrasyon ug sa pagpangita og mas lig-on nga pamaagi sa transparency ug accountability.
Kahinumduman nga sa wala pa kini mahitabo, migawas na usab ang mga pangalan sa ubang kongresista nga gilangkuban nila Ronaldo Puno sa Antipolo, Vincent Franco “Duke” Frasco sa Cebu, Toby Tiangco sa Navotas, ug Alfredo “Albee” Benitez sa Bacolod isip mga posibleng kandidato.
Bisan pa man sa maong mga hungihong, klaro na nga si Dy ang napili nga kompromiso ug nagkahiusang kandidato sa kadaghanan sa Kamara.
Samtang, si Cong. Toby Tiangco nagpasabot nga wala siyay plano nga molingkod sa mas taas nga posisyon.
Matod pa niya, tungod kay aktibo siya sa paglantaw ug pag-imbestiga sa mga isyu sa korapsyon, dili angay nga siya usab ang mamahimong lider sa Kamara.
Ang pagpuli ni Dy giisip nga usa ka estratehikong lakang sa pagpalig-on sa unity ug direksyon sa House of Representatives, samtang nagpadayon ang diskusyon sa daghang isyu sa gobyerno ug sa publiko.
