Pagaimbestigahan karon sa Davao City Police Office ang usa ka viral video nga nagpakita sa usa ka 14-anyos nga menor-de-edad nga nagpanigarilyo og gituohang marijuana. Ang maong video gi-upload sa Facebook niadtong Septiyembre 9, 2025. Una kining giila nga lain nga tawo, apan human sa beripikasyon sa Intel Operatives, nakumpirma nga kini usa ka Grade 8 student nga taga Bangkal, Talomo, Davao City.
Sa pagsusi sa kapulisan, nahibaw-an nga ang bata mihunong sa pag-eskwela, pirme mag-uban sa barkada ug mibulag sa ilang balay sa wala pa mogawas ang video. Human sa padayon nga paningkamot, niadtong Septiyembre 13, malampuson kining nasagop ug gidala sa Police Station 3–Talomo uban ang iyang ginikanan.
Gipahimangnoan sa DCPO nga ang ginikanan ug guardian adunay dakong papel sa pag-giya ug pagpanalipod sa ilang mga anak batok sa dautang impluwensya. Ang publiko gidasig usab nga motabang pinaagi sa pagsumbong dayon sa mga awtoridad imbes nga ipakalat pa online. Dugang pa, ang mga responsable sa pag-post ug pag-share sa video mahimong pasakaan og kaso ubos sa R.A. 7610 ug R.A. 10175. Padayon ang imbestigasyon aron masuta kinsa ang nagpaluyo sa video ug sa kalambigitan sa menor sa ilegal nga droga.
