Nagpasidaan ang Davao Light and Power Company (DLPC) sa publiko batok sa pagpatuman og walo ka oras nga scheduled power interruption karong adlaw’ng Huwebes, Agosto 28, alas 10 sa gabii hangtod sa Biyernes, Agosto 29, alas 6 sa buntag. Apektado niini ang pipila ka lugar sa palibot sa Maa Flyover, lakip ang Maa Diversion Road, Monteritz Subdivision, ug ubang kasikbit nga lugar.
Sumala sa DLPC, temporaryong palungon ang kuryente aron mahatagan og higayon ang ilang mga crew sa pagbuhat sa pagbalhin sa poste sa maong dapit. Kini usa ka lakang aron masiguro ang kaluwasan sa operasyon ug malikayan ang disgrasya sa panahon sa trabaho.
Gipangayo na lamang daan sa kumpanya ang pagsabot sa publiko tungod kay mahimong makaapekto kini sa adlaw-adlaw nga mga buluhaton sa katawhan. Posible sab nga molungtad ang brownout labaw pa sa gikatakda nga panahon kon adunay mga dili malikayan nga sitwasyon nga mosangpot sa dugang nga pagkalangan.
