Nipasalig ang Bureau of Internal Revenue (BIR) nga ilang gukdon ang tanang minilyon nga wala mabayri nga buhis gikan sa smuggled vape products.
Kalabot niini, gipasaka usab sa BIR ang mga kaso sa tax evasion batok sa 75 ka indibidwal ug negosyo nga nalambigit sa ilegal nga pagpamaligya og vape products sa Pilipinas.
Base sa datus, ang kinatibuk-ang buhis nga nasakmit gikan sa mga dinakpan tungod sa pagbaligya sa dili rehistrado ug smuggled nga mga produkto sa vape sa pipila ka mga dapit sa nasud gibanabana nga anaa kini sa P711.13 milyon.
Kabahin sa kampanya batok sa mga kalapasan sa Tax Code, ang BIR, nga gipanguluhan ni Commissioner Romeo Lumagui Jr., nipasaka og mga kaso sa tinuyong kapakyas pagbayad og buhis, pagtipig og peke nga resibo sa BIR, ug paglapas sa Excise Tax Law.
Si Commissioner Lumagui nipahimangno batok sa pagpalit ug paggamit sa mga illegal nga vape products tungod kay gawas nga delikado kini sa panglawas, dako pa kini nga kapildihan sa buhis.
Gipasabot sa opisyal nga manubag sa BIR ang tanang nalambigit sa illegal vaping ug ghost receipts.
