Nasakpan sa mga security personnel ang usa ka lalaki nga nanikwat og duha ka botelya sa whisky sa usa ka supermarket sa Baseline, Barangay Capitol Site, Cebu City, niadtong, Lunes, Agosto 18, 2025.
Gisulayan unta sa suspek nga mogawas sa tindahan nga wala miagi sa cashier ug walay bayad-bayad, hinungdan nga gibara siya sa mga gwardya ug dali nga gi-turn over sa Abellana Police Station 2 sa Cebu City Police Office.
Sumala pa sa imbestigasyon, nabantayan na sumala pa daan ang lihok sa suspek, maong gisundan kini sa mga security guard sulod sa supermarket.
Taud-taod, nakita siyang mipunit og duha ka botelya sa whisky ug misulay ug gawas diretso sa exit, hinungdan nga gibabagan dayon kini sa mga guwardya.
Miangkon ang suspek sa gihimo ug gibutyag nga plano niyang ibaligya ang maong whisky aron unta mupalit og shabu.
Tungod niini, gihikay na ang kasong theft batok kaniya samtang nagpabilin siya sa kustodiya sa kapulisan.
