Gilamoy sa dakong sunog kagahapong adlawa, Agusto 18, ang Purok San Isidro, Barangay Agdao Proper ning Dakbayan.
Gibanabana nga anaa sa kapin 70 ka mga panimalay ang naugdaw sa kalayo ug mikabat sa 280 ka mga residente ang apektado sa maong sunog.
Subay sa datos sa Bureau of Fire Protection, nga residential single family dwelling ang naapektuhan ug mikabat sa kapin 1,000 square meters ang gilukopan sa sunog.
Ang maong insidente misugod alas-1:06 sa hapon ug gisaka sa ikaduhang alarma alas-1:40.
Nadeklarar nga fire under control alas-2:31 sa hapon ug hingpit na kining napalong pagka alas-3:39 sa hapon.
Lakip sa miresponde sa maong operasyon ang tulo ka mga fire trucks gikan sa BFP Charlie, Lanang ug SPMC samtang mitabang usab ang walo ka mga auxiliary fire brigades sama sa Davao Raven, Davao Volunteer Fire Brigade, DFRS, FCFF, Barangay 5A, Sasa ug Central 911.
Duha usab ka ambulansya ang miduol sa lugar uban ang usa ka rescue truck gikan sa SRF Alpha.
Mapasalamaton sab ang hingtungdan nga walay narekord nga casualty, samaran, o missing sa maong sunog.
Gibanabanaan sab nga mukabat sa P1.5 milyon ang kinatibuk-ang danyos nga resulta sa maong insidente.
Samtang nagpabilin nga walay klarong hinungdan sa pagkasunog, diin padayon pa nga ginalusad sa BFP ang imbestigasyon aron matumbok ang tinood nga sinugdanan niini.
Samtang, aduna sab pipila ka mga residente nga nagpadayag sa ilahang kasubo gumikan sa maong panghitabo.
Sa pagkakaron, temporaryong gipuy-an ang barangay hall ug covered court sa mga biktima samtang ang barangay naghangyo og dugang tabang gikan sa lokal nga panggamhanan sa Davao City aron masuportahan ang mga pamilya nga nawad-an og panimalay.
