Hapit na gyud ang gipaabot nga modernisasyon sa transportasyon sa Davao City human nga ang napulo ka bag-ong Yutong ZK6126HG low-floor city buses sa ilawom sa Davao City Interim Bus Service (DIBS) andam na alang sa delivery ug moabot sa lungsod sa musunod nga mga bulan.
Ang matag bus nagkantidad og hapit ₱10 milyon ug gilaraw aron mas sayon ug luwas ang pagsaka sa mga pasahero pinaagi sa low-floor design.
Kompleto kini sa air-conditioning ug mga commuter-friendly nga interiors, samtang adunay accessibility features alang sa mga PWD ug bicycle holder sa atubangan alang sa mga pasahero nga magdala og bisikleta.
Ang modernong porma ug disenyo sa bus nagpasalig sa komportable ug kasaligan nga byahe sa katawhan.
Gisuportahan ang maong proyekto sa Lokal nga Kagamhanan sa Davao (LGU) pinaagi sa ₱105.99 milyon Development Fund, diin ₱100 milyon ang gigahin sa mga bus ug ang nahabilin alang sa konstruksyon sa bus garage ug operations center sa Davao City Overland Transport Terminal (DCOTT).
Ang matag bus makasakay og 93 ka pasahero, nga adunay 31 ka mga lingkoranan ug mamahimong makatindog ang 62 kabuok, ug gilauman nga makatabang sa pagtagbo sa panginahanglan sa mobility sa lungsod.
Kini nga interim service, nga gisundan ang kalampusan sa Peak Hours Augmentation Bus Service (PHABS), nagtimaan sa usa ka mahinungdanon nga lakang padulong sa mas inclusive, organisado, ug modernong public transport system sa Davao.
Gilaraw nga moabot ang mga bus sa lungsod sa pagsugod sa Setyembre 2025, ug sugod sa fourth quarter sa tuig, libre ang biyahe sa mga Dabawenyos sa unang rollout.
Ang mas dako nga Davao Public Transport Modernization Project (DavaoBus), nga mag-deploy og kapin sa 1,000 ka buses uban ang suporta sa Asian Development Bank, nagpadayon sa pagpangandam alang sa full implementation sa musunod nga mga tuig.
