Hulicam ang usa ka lalaking nangawat og liquefied petroleum gas o LPG tank sa usa ka balay sa Barangay 210, Tondo, Maynila kagahapong adlawa, Agosto 14 ning tuiga.
Sa kuha sa CCTV, spotted ang usa ka lalaki human niining gikab-ot ang karahay nga gipatong sa LPG ug ang pagbutang niini sa karahay sa salog, dayon kuha sa LPG ug misibat nga daw kilat.
Sumala kang Shiela Reyes, ang maong lalaki ang mismong nagtaod sa CCTV sa ilang panimalay.
Gisaysay ni Reyes nga hinanok na sa pagkatulog ang iyang ginikanan, rason nga sa ilang pagmata pa nila namatikdan nga wala na silay gasul ug sa ilang pagreview sa CCTV, nailhan dayon nila ang kawatan.
Gilayon silang miadto sa barangay ug nagreklamo. Nasayrang sagad masuguan ang suspek nga ayuson ang mga gubang gamit sa ilang silingan, apan daghan na matud pa nga reklamo ang nadawat sa barangay.
Gani, nahilakip sab kini sa drug watchlist ug kanunayng ginapasaylo ang iyang mga binuhatan sa barangay gumikan sa settlement.
Sa karon, padayong ginapangita sa otoridad ang suspek.
Igo na lamang sa pagpahinumdom ang barangay nga mag-igmat sa mga taong ginasaligan ug ginapasulod sa panimalay.
