Pagpakatag og fake news ang nahimong sulusyon sa usa ka lalaki aron matud pa mapansin sa gobyerno ang ilang gubang kalsada.
Saysay ni Mamerto Badenas, naghimo siya og istorya nga dunay Malaysian aircraft nga nahagbong sa ilang sitio nga gikaalarma sa otoridad, rason nga nagdali-dali og imbestiga ang otoridad sa Sitio Candelaria, Barangay Tagumpay, Roxas, probinsiya sa Palawan.
Wa matud pa kini nagdahom nga hilabihan ang mamahimong resulta ug kabalaka sa iyang gibuhat, apan depensa niini, gibuhat lamang matud pa niini ang maong butang gumikan buot niini nga maadtuan ang ilang lugar aron makita ang kahimtang sa ilang dalan.
Gani, sa ubang lugar matud pa sementado na ang kalsada, apan sa ilang kabahin, dugay na matud pa silang nag-antos ug dakong perwisyo kanila ang paingon sa trabaho ug eskwela, rason nga gikwestiyon niini ang ilang kapitan og nganong di masulosyunan ang ilang mulo gumikan daghan na sab ang nangamatay.
Sa pikas bahin, dismayado matud pa si Kapitana Merlinda Herrera gumikan di na matud pa angay mahitabo ang gibuhat ni Badenas tungod pwedeng direktang magreklamo sa gobyerno, inay nga magbuhat og fake news.
Apan, giklaro ni Badenas nga wala niya giingon nga dunay nahagsa nga eroplano, apan igo lamang nag-emergency landing.
Gumikan sa alarma nga namugna ni Badenas, miresponde ang mga kapolisan, kasundalohan, mga tanod, mga personahe sa munisipyo ug barangay.
Apan, sa dihang nasayran ang kamatuoran, gilayong giaresto si Badenas ug mag-atubang og tukmang kaso.
