Gipasiugda ni President Ferdinand “Bongbong” Marcos Jr. ang “Isumbong sa Pangulo” website.Ang maong website matud pa tugutang ma-access sa publiko, lakip na ang kantidad, contractor ug ubang detalye sa flood-control projects.
Gani, gipakita sab sa pangulo ang tally sa flood control projects sa tibuok nasud ug ang nagkadaiyang kontratista.
Gumikan niini, gipaniguro sa pangulo ngadto sa publiko nga personal matud pa niining tukion ang tanang mga taho nga gisumite ngadto kaniya pinaagi sa tabang sa maon plataporma.
Pinaagi sab matud pa sa maong website, gawas sa makahatag og ‘feedback’ ang katawhan, makatabang sab matud pa kini aron masiguro nga ang proyekto mahuman sa saktong oras, magdugay ug gawas sa kurapsiyon.
Kahinumdumang gisaway sa pangulo atol sa ikaupat niining State of the Nation Address ang pipila ka mga politikong ginabulsa ang kwarta sa gobyerno.
Gani, sumala pa kang Sen. Ping Lacson, mukabat sa sobra 67 matud pa ka mga kongresistang contractors ang nagapangurakot sa flood control projects.Sa pikas bahin, dako ang pagduda sa pangulo human masuta sa imbestigasyon nga 25 porsyento sa tanang flood control projects sa nasud naadto lamang sa 15 ka kontraktor.
Gani, lima sa maong mga kompanya adunay proyekto sa halos tanang rehiyon sa Pilipinas. Usa sa nabantayan sab matud pa sa pangulo ang kaparehong kantidad sa pipila ka proyekto bisan managlain ang lokasyon niini, nga nakapukaw og pangutana sa kahapsay sa proseso sa pagpili sa mga kontraktor.
Gumikan niini, nagmando si Marcos sa Department of Public Works and Highways (DPWH) nga ipakita ang kompletong detalye sa kontrata ug pag-apod-apod sa pondo aron masiguro nga patas ug hapsay ang proseso sa pagpili sa mga kontraktor.
