Nakatigom ang Philippine National Police (PNP) og dili moubos sa P20 milyon nga kantidad sa pondo gikan sa charity boxing match nga ilahang gipahigayon kagahapong adlawa, (Hulyo 27, 2025).
Matod ni PNP Chief PGen. Nicolas Torre III, nakadawat ang ilahang buhatan og kapin sa P16.3 milyon nga donasyon.
Gawas pa niini, nakadawat usab ang Nasudnong kapulisan og bugas, mga de-lata, ug ubang relief items gikan sa lain-laing mga sponsors.
Ang maong pondo ug mga relief items ipang-apod-apod sa mga biktima sa miaging mga bagyo.
Una na nga nakapahigayon og relief distribution ang PNP sa Baseco Compound, usa sa mga lugar nga grabe ang pagbaha tungod sa walay hunong nga ulan sa milabayng mga adlaw.
Samtang, ang uban pang bahin sa pondo gihatag na sa Department of Social Welfare and Development (DSWD), Philippine Red Cross (PRC), ug ubang mga ahensiya sa gobyerno sa Quezon City.
Sa pagkakaron, naabot na sa tukmang mga ahensya ug pipila ka mga residente ang mga unang ayuda.
Nagpadayon usab ang kapulisan sa ilang aktibong partisipasyon sa relief operations isip tabang sa mga grabe nga naapektuhan sa mga kalamidad.
Nagpasalamat si PGen. Torre sa tanang misuporta sa maong programa, ilabi na sa mga sponsors nga mitabang aron mahimong malampuson ang charity boxing match.
