Mas misamot pa ang kusog sa tropical storm nga si Crising samtang nagdool kini sa extreme Northern Luzon.
Namatikdan ang sentro sa bagyo sa gilay-on nga 195 kilometro sa sidlakan sa Tuguegarao City, Cagayan.
Nagalihok kini pa-kasadpan samtang padayon ang pagduol niini sa yuta. Nagdala kini og hangin nga adunay kusog nga 75 km/h duol sa sentro, ug may mga bugso nga moabot sa 90 km/h.
Gipahamtang ang Signal No. 2 sa mga lugar sa Batanes, Cagayan (lakip ang Babuyan Islands), Isabela, Apayao, Kalinga, Ilocos Norte, amihanang ug sentrong bahin sa Abra, silangang bahin sa Mountain Province ug Ifugao, ug amihanang bahin sa Ilocos Sur.
Lakip sa Signal No. 1 ang Quirino, Nueva Vizcaya, nahibiling bahin sa Mountain Province, Ifugao, Abra, Benguet, Ilocos Sur, La Union, amihanang bahin sa Pangasinan, amihanang bahin sa Aurora, ug amihanang-sidlakang bahin sa Nueva Ecija.
Gina-awhag ang mga residente sa maong mga dapit nga magbantay batok sa posible nga pagbaha, landslide, ug kusog nga hangin.
Padayon nga ginabantayan sa mga otoridad ang lihok sa bagyo aron mahatagan og tukmang pahimangno ang katawhan.
