Gilimod pag-ayo ni Retired Police Lieutenant General Jonnel Estomo ang mga pasangil nga nalambigit siya sa kaso sa pagkawala sa mga sabungero.
Misunod ang maong pamahayag human kini gidawit sa whistleblower nga si Julie Patidongan, nailhan usab nga si alyas “Totoy,” nga nag-ingon nga usa si Estomo sa mga responsable sa maong insidente.
Matud ni Estomo nga andam siya nga atubangon ang bisan unsang imbestigasyon ug mopresentar sa ebidensya aron mapamatud-an nga limpyo ang iyang pangalan.
Gipahibalo usab niini nga giandam na sa iyang mga abogado ang kaso batok kang Patidongan.
Kahinumduman nga mibutyag si Patidongan nga gihulga sumala pa siya nga patyon sa negosyanteng si Charlie “Atong” Ang pinaagi sa mando kuno ni Estomo, tungod sa ilang panagbangi nga adunay kalabotan sa kwarta.
