Nagpagula og kamanduan ang Philippine Amusement and Gaming Corporation (PAGCOR) alang sa hinanaling pagtangtang sa tanang billboard ug outdoor advertisement nga may kalabotan sa sugal, isip kabahin sa ilang paningkamot nga maprotektahan ang mga kabatan-onan ug ubang sektor batok sa pagkaadik sa sugal.
Gihatagan og 15 ka adlaw nga lugway ang mga lisensyadong gambling operators ug suppliers aron tanggalon ang ilang mga ad nga nakabutang sa tren, bus, jeep, taxi, ug uban pang pampublikong lugar.
Gipangayo usab sa PAGCOR nga magsumite ang mga operator og inventory sa ilang mga advertisement, lakip ang gidak-on niini, gigamit nga mga materyales, lokasyon, petsa sa pag-expire sa kontrata, ug permit gikan sa Ad Standards Council (ASC).
Nagpahimangno usab ang PAGCOR batok sa mga magbutang og bag-ong gambling ads, ug gipasidaan nga adunay silot nga ipahamtang alang sa mga molapas sa maong mando.
