Misaad si World Boxing Council (WBC) welterweight champion Mario Barrios nga dili kini magpakita og kaluoy kang 8-Division world champion Manny Pacquiao sa umaabot nga panagsangka sa duha.
Sumala pa ni Barrios, nga wala sa iyang plano nga buhaton ang susama nga panghitabo sa panagsangka ni Jake Paul ug Mike Tyson nga sumala pa nagpakita og kalouy ang bag-o nga boksingero batok sa boxing legend nga si Tyson.
Inay nga kaluy-an, ipatilaw sumala pa ni Barrios ang kabug-aton sa iyang kinumo ngadto sa Filipino boxing icon.
Rason pa ni Barrios, nga kung ugaling mabaliktad ang situation, sigurado sumala pa kini nga dili usab magpakita og kaluoy si Pacquiao kaniya.
Gibarugan usab sa welterweight champion nga walay lugar ang kaluoy sa sport nga ilang gisudlan, ug andam kini nga depensahan ang titulo, bisan kinsa pa ang iyang atubangon.
Sa pagka karon, 46 anyos na si Pacquiao samtang ang iyang kalaban nga boksingero anaa pa sa 30 anyos.
Bisan paman sa mas daghan nga kasinatian ni Pacquiao sa ibabaw sa ring, gikuptan ni Barrios ang uban pang physical advantages susama sa height advantage ug aduna usab kini mas taas nga mga kamot tandi kang Pacquiao.
Nakatakda na ang ilang panagsangka karung Hulyo 20 (Phil. time) ning kasamtang tuig.
