Dismayado ang Malacañang sa pag-underestimate ni Bise Presidente Sara Duterte sa pag-ila sa San Juanico Bridge isip usa ka tourist spot.
Gibutyag ni Palace Press Officer Claire Castro nga ang maong tulay nga adunay gitas-on nga 2.16 kilometros ug natukod pa niadtong 1973, usa ka simbolo sa katahom ug abilidad sa engineering sa Pilipinas.
Matod pa ni Castro, dili basehan ang kagamay o gitas-on sa usa ka tulay aron mahimong tourist spot kini.
Gihatagan pa niini og pananglitan ang Golden Gate Bridge sa San Francisco, California, nga 2.7 kilometros lamang ang gitas-on, ug ang El Marco nga nagsumpay sa Spain ug Portugal, nga 6 metros lamang ang gilapdon apan gilauman nga mga tourist spot gihapon.
Matod sa opisyal, makaguol nga samtang hugot nga ginasuportahan ni Pangulong Marcos ang turismo sa Pilipinas, kaubang Pilipino pa mismo ang nagapaluya niini.
Kini nga pamahayag sa Palasyo maoy tubag sa gisulti ni VP Sara Duterte sa Australia, diin iyang gikwestyon kung giunsa man nga nahimong tourist spot ang San Juanico Bridge.
