Mokabat sa P3,625,000 ang kantidad sa palusot nga sigarilyo ang nakumpiska sa mga otoridad atol sa gilusad nga entrapment operation sa kapulisan kagabii.
Subay sa report sa mga otoridad, gipahigayon ang operasyon sa Brgy.19-B. ning dakbayan sa Davao
pasado alas Onsi ang takna kagabii nga miresulta sa pagkasikop sa suspetsado nga giila nga si alyas “Mark” hamtong ang panuigon nga residente sa maong dapit.
Sumala pa sa Davao City Maritime Police Station (MARPSTA) nga nangulo sa maong operasyon nga ilahang nakumpiska 145 ka mga master cases sa mga nagkadaiyang brand sa sigarilyo nga sagad gikan sa laing nasud nga walay mapakita nga dokumento sama sa walay graphic health warning nga kini ang dakong kasupakan sa balaod.
Sa pagkakaron ang dinakpan ang gikatakda nga pasakahan og kaso karong adlawa nga kini subay sa kasupakan sa Republic Act No. 10643.
Padayon usab ang gihimong imbistigasyon sa mga otoridad kabahin sa mga kontrabando nga gipalusot dinhi sa dakbayan sa Davao.
