Nakatala og Ciento porsyento nga resolution rate ang regional office sa Department of Trade and Industry (DTI 11) sa mga reklamo sa konsumante, human niini masulbad ang tanang 91 ka mga reklamo nga nadawat gikan sa tibuok Davao Region.
Sumala sa DTI 11, kadaghanan sa mga reklamo,57% nga gipasa personal sa mga walk-in clients, samtang 42% ang gisumiter online pinaagi sa email ug opisyal nga Facebook pages sa departamento.
Ang nahibiling 1% sa mga reklamo gipasa sa ubang ahensya alang sa paghatag og aksyon.
Gibutyag sa DTI 11 nga ang kasagarang matang sa mga reklamo naglakip sa mga isyu sa product ug service liability (22%), mga paglimbong, dili patas ug abusadong mga pamaagi sa pagpamaligya (21%), ug mga warranty sa consumer products ug serbisyo (15%).
Gipasabot usab sa departamento nga sa tibuok ihap sa reklamo, 35 ka mga kaso ang malampusong nasulbad pinaagi sa mediation sulod sa average nga 6.9 ka adlaw nga trabaho.
Sa maong ihap, 21 ang naka-kab-ot og mediation agreements, samtang 14 ang gi-isyuhan og certificate to file action. Dugang pa niini, pito ka reklamo sa konsumante ang nasulbad pinaagi sa adjudication sulod sa 20 ka adlaw nga trabaho.
Sa maong mga kaso, 86% o unom ang gi-grant, samtang usa lamang ang gi-dismiss. Samtang gipangunahan usab sa DTI 11 ang ilahang tinguha nga padayon nga bantayan ug ipatuman ang mga balaod sa patas nga pagpamaligya (Fair Trade Laws) aron maprotektahan ang mga konsumidor batok sa mga iligal nga pamaagi sa negosyo ug sa mga delikado o substandard nga produkto.
Subay sa report sa departamento nga 1,312 ka mga kompanya ang ilang namonitor, ug 100% niini ang nakatuman sa mga balaod sa patas nga pagpamaligya.
Dugang pa niini, adunay 173 ka mga kompanya ang gi-monitor alang sa presyo sa Basic Necessities & Prime Commodities, ug ang tanang gi-monitor nakapakita og bug-os nga pagtuman sa regulasyon.
