Mas gipalig-on pa sa Police Regional Office (PRO) XI ang ilahang paningkamot sa pakigbatok sa bullying sa mga tunghaan sa tibuok Davao Region pinaagi sa malampusong pagpalapad sa kasayuran kabahin sa Republic Act 10627, o ang “Anti-Bullying Act of 2013,” ngadto sa nagkalain-laing mga institusyon sa edukasyon, nga misangpot sa zero nga nareport nga kaso sa bullying.
Kabahin sa ilahang padayon nga paningkamot alang sa kaayohan sa kabatan-onan ug pakighiusa sa komunidad, ang PRO XI nakapahigayon og 107 ka mga lecture ug symposium sa mga elementarya, sekondarya, ug sa koleheyo nga tunghaan sa unang quarter karong tuiga. Ang mga sesyon gitumong aron hatagan og mas lawom nga pagpasabot ang mga estudyante, magtutudlo, ug mga school administrators sa mga probisyon sa balaod, nga nagpunting sa legal nga silot sa bullying ug sa dakong panginahanglan nga magmugna og inklusibo ug respetadong natad sa edukasyon.
Ang awareness campaign naglakip og interactive nga mga diskusyon ug mga tinuod nga senaryo aron epektibong mapalapad ang mensahe. Ilabi na, ang PRO XI mitaho og zero nga narehistro nga kaso sa bullying sulod sa ilahang hurisdiksyon sa unang quarter ning tuiga, nga usa ka positibong timailhan sa inisyatiba sa maong kampanya. Gumikan niini, nag-awhag si PRO XI Regional Director, B/Gen Leon Victor Rosete, ngadto sa publiko nga magpabiling mabinantayon ug ireklamo gilayon sa labing duol nga police station ang bisan unsa mang insidente sa bullying.
Gipasabot usab niini ang kamahinungdano sa panaghiusa sa komunidad sa pagpanalipod sa kahimtang sa tanang katawhan, ilabi na sa mga estudyante ug kabatan-onan, gikan sa ingon nga mga binuhatan.Samtang nagpabilin ang PRO XI sa ilahang padayon nga pagbantay sa mga kaso sa bullying sa rehiyon, isip usa ka law enforcement agency ug usa ka mahinungdanong kauban sa pagtukod sa nasud, subay sa direktiba ni PNP Director General Rommel Francisco Marbil.
