Mokabat sa lima ka mga myembro sa New People’s Army kon NPA ang mitahan sa ilahang kaugalingon og mibalik na sa sabakan sa gobyerno. Lakip sa ilahang pagtahan ang gidala niini nga mga armas nga ilahang gigamit sa kalihukan.
Adunay upat ka mga high-powered fire arms ug usa ka pistola ang naturn-over na ngadto sa mga otoridad. Usa sa lima ka mga rebelde nga mitahan mao si Ka Liboter kon Alyas Datu Makapugong, nga residente sa Kabanglasan, Bukidnon. Misaad kini nga dili na niini sayangan ang opurtunidad nga gihatag sa gobyerno ngadto kanila. Nasayran nga naglihukan ang lima ka mga myembro sa NPA sa Guerilla Front 88, nga nagapahigayon ug operasyon sa mga probinsiya sa Agusan del Sur ug Agusan del Norte.
Samtang dako usab ang kalipay ni Governor Edwin “Kuya Gov” Jubahib nga midawat sa lima ka mga miyembro sa New People’s Army (NPA) nga mibalik sa sabakan sa kagamhanan kagahapon sa hapon tungod gipili niini ang gidumalaan nga probinsya gumikan dako ang pagsalig sa mga nahisgutan.Nasayran sumala pa sa mga rebelde nga maayu ang pagtratar sa probinsya sa mga mitahan sa ilahang kaugalingon ngadto sa gobyerno. Atol sa maong seremonya, anaa usab ang 1001st Brigade Commander nga si BGen.Felix Ronnie Babac, Deputy Commander Col. Harold Argamosa, DNPPO Provincial Director PCol. Alexander Serrano, Jr. ug DILG Provincial Director Jonathan Leybag.
Ang mga kanhing rebelde ang maka-benepisyo sa programa sa nasudnong panggamhanan sama sa E-CLIP (Enhanced Comprehensive Local Integration Program), ug makadawat usab sila sa lokal nga E-CLIP program. Itanyag usab kanila ang libreng abogado alang sa ilahang mga kaso ug mahatagan og amnestiya.Gumikan sa maayong implementasyon sa maong programa, bag-ohay lamang gipasidunggan ang Davao del Norte isip usa sa mga Best E-CLIP Implementers sa nasud, gikan sa Department of National Defense Affairs – Task Force Balik Loob.
