Gikanayon sa Davao City Police Office nga duna na matud pa silay duha ka persons of interest mahitungod sa pagpamusil-patay sa gikaingong caretaker sa Marilog, District ning dakbayan sa Davao.
Gibutyag ni PCapt. Hazel Caballero-Tuazon nga panagbangi sa yuta ang usa sa mga anggulong ginatan-aw sa buhatan, diin maoy hinungdan sa maong krimen.
Kahinumduman nga gipusil patay si Ronald Sukon, usa ka Bagobo Tagabawa kansang nagatugway lamang kini sa kanding kaniadtong nakalabay nga adlaw sa Sitio Pinagudlutan, Barangay Baganihan.
Nasayran usab nga misulay pa og dagan ang biktima padulong sa panimalay niini apan giusaban pa kini og pusil sa maong suspetsado.
Dugang pa usab ni Tuazon nga ginalantaw gihapon sa buhatan ang lain pang anggulo sa maong panghitabo.
Nasayran sab nga ginapadaplin usa sa maong kabanay ni Ronald ang hisgutanang panagbangi sa yuta ingon man nga nagbangutan pa kini sa pagkahanaw sa ilahang kabanay.
Una na usab nga gikanayon sa amahan sa biktima nga si Pedro Sukon nga nagkasabot na matud pa sila sa ilahang kabanay nga dili mubalos sa dihang matumbok ang mga suspek.
Dugang niini nga wala sa ilahang tribu ang pagpanimalos ug ginasalig na lamang kini ngadto sa Labaw nga Makagagahom.
Sa karon, gihaya na ang biktima sa gikaingon dapit.
Samtang singgit gihapon sa kabanay niini ang hustisya.
Giawhag usab ni kapulisan ang mga witnesses nga mihatag og pamahayag nga dili bawion ang mga gipanulti niini aron nga masuta gayud sa otoridad ang tinuod nga suspetsado.
