Gibalik na sa normal ang serbisyo sa Davao City Central 911 human masulbad ang teknikal nga problema nga misangpot sa kalit nga pagka-unavailable sa ilang hotline alang sa mga Globe ug TM subscribers. Karon, anaa na sa husto ang linya ug puwede na usab tawagan sa tanang network, lakip na ang Globe ug TM.
Sa nakalabay’ng adlaw, nagpahibalo ang Central 911 nga aduna silay kasamtangang problema sa sistema, hinungdan nga dili makalusod ang mga tawag gikan sa mga subscriber sa Globe ug TM. Ang maong problema nakahatag og kabalaka sa publiko nga nagkinahanglan og paspas nga emergency response.
Apan sa pinakabag-ong update karong adlawa, gikompirmar na nga operational na ang hotline ug mahimong matawagan og direkta pinaagi sa 911 bisan unsang network ang gamiton. Gidasig sa sab Davao City Central 911 ang katawhan nga gamiton ang serbisyo alang lamang sa tinuod nga mga emerhensya ug dili kini abusohon.
