Gikumpirma sa Digos City Police Station ang usa ka insidente sa pagtapos sa sarilig kinabuhi nga nahitabo pasado alas 8:00 sa buntag niadtong Mayo 14, 2025, sa Sitio Palayan, Barangay Igpit, Digos City, Davao del Sur.
Misulong dayon ang kapulisan sa lugar pagkadawat sa taho aron susihon ang insidente ug buhaton ang imbestigasyon sa panghitabo.
Pag-abot sa mga otoridad, ila kining nasaksihan nga nakuha na sa amahan ang lawas sa biktima gikan sa pagkabit sa nylon nga pisi nga gilambud sa kisame sa ilang kusina.
Sumala sa amahan, dugay na nga nagapadayag og mga hunahuna sa pagpakamatay ang iyang anak, ilabi na kon hubog.
Bisan pa sa paningkamot sa pamilya nga motabang ug makig-istorya kaniya, nagpadayon gihapon ang iyang dili maayo nga sitwasyon. Walay nakita nga timailhan sa foul play base sa inisyal nga imbestigasyon.
Ang lawas sa biktima gidala na sa Padilla Funeral Home sa Barangay Aplaya alang sa post-mortem nga eksaminasyon.
Samtang gipahinumdom usab sa kapulisan ang importansya sa pangisip nga panglawas ug nag-awhag sa publiko nga mangita og tabang kung adunay gibati nga kalisod sa kinabuhi.
