Migula ang kontrobersiya sa Buhangin Police Station human usa ka inahan misumbong nga gidapatan sa mga pulis ang iyang anak ug kauban niini nga nangayo og tabang sa ilang estasyon.
Apan, giingon sa kapulisan nga bakak ang maong pasangil, ug matod pa nila, ang duha ka babaye maoy miunang miatake ug nisukol sa mga personahe sa ilang estasyon.
Matud sa Davao City Police Office (DCPO), ang mga babaye usa niini minor de edad ug ang iyang lesbianang partner nga hamtong midangop sa police station human malambigit sa kagubot atol sa ilimnong makahubog.
Giingon nga gipangbuno ug gi-daug-daug pa sila sa ilang kaugalingong mga paryente, hinungdan nga nangayo sila og tabang. Apan, pag-abot sa estasyon, hubog pa ang duha ug nagpakita og agresibong pamatasan ingon man nanghasi, nanginsulto ug nanakit sa mga pulis ug auxiliary personnel nga naningkamot nga magpugong sa kagubot.
Gipasabot sa kapulisan nga ilang gihimo ang pagdakop ug pagpugong subay sa Standard Operating Procedures (SOP) ug PNP Operational Procedures aron malikayan ang dugang kasamok ug kadaut.
Kalabot niini, nagpadayon karon ang internal investigation aron masiguro ang transparency ug mapanubag ang angay manubag kung adunay kalapasan.
Gisang-at na usab ang mga kasong Direct Assault ug Alarm and Scandal batok sa duha ka personahe nga midangop sa ilang estasyon ngadto sa Office of the City Prosecutor.
Nagpahinumdom usab ang DCPO sa publiko labot sa kahinungdanon sa pagkamasinugtanon sa balaod, pinaagi sa pagsunod sa hustong pamatasan aron malikayan ang legal nga silot, ingon man kini makatampo sa usa ka mas luwas ug malinawon nga katilingban alang sa tanan.
