Gipahibalo sa Department of Agriculture (DA) nga ilahang target nga padayonon ang pagbaligya sa bugas nga tag-P20 matag kilo hangtud sa tuig 2028. Kini human sa direktiba ni Pangulong Ferdinand Marcos Jr. nga himoong long-term ang pagbaligya sa barato nga bugas.
Sumala ni Agriculture Secretary Francisco Tiu Laurel Jr., ang orihinal nga plano mao nga kutob lamang sa Disyembre karong tuiga ang pagpamaligya sa barato nga bugas, apan posible kini nga mapalugwayan hangtud Pebrero 2026. Gibutyag pa ni Laurel nga nasabutan sa pulong uban ni Pangulong Marcos nga 10 kilos matag semana ang maximum nga mabaligya sa matag tawo sa Visayas, nga mahimong 40 kilos matag bulan.
Nasayran nga ang Visayas mao ang napiling lugar alang sa pilot implementation tungod daghang katawhan ang mas nanginahanglan og barato nga bugas sa rehiyon. Apan matod ni Laurel, plano sab kini nga ipatuman sa tibuok nasud sa umaabot nga panahon. Gisiguro sa kalihim nga adunay igong stock sa bugas sa Visayas, ilabi na sa Iloilo City. Sa kinatibuk-an, mokabat sa 358,000 ka tonelada ang stock nga bugas nga anaa sa ilahang mga bodega sa nagkadaiyang lugar.
Gikanayon usab nga kinahanglan na kining ipagawas karon nga panahon sa pag-ani. Kini nga inisyatiba usa ka lakang aron masiguro nga abot-kaya ang bugas alang sa mga Pilipino, ug masuportahan ang sektor sa agrikultura.
