Patay ang usa ka gwardya human nga gipusil sa wala mailhing suspetsado pasado alas Dusi ang takna kagabii. Subay sa report sa Davao Ciyt police office nga ang biktima giila nga si alyas Ferdie, usa ka security guard sa Guardant Security Services Inc nga residente sa SIR New matina ning dakbayan sa Davao.
Subay sa imbistigasyon sa Talomo PNP, nahitabo ang pagpamusil pasado alas Dusi kagabii sa Purok 47, San Roque, Bangkal Brgy. Talomo Proper ning siyudad sa Davao. Dugang pa sa mga otoridad nga ang kauban niining gwardiya nagbutyag nga nakadungog na lamang kini og sagunson nga buto sa armas. Ug sa iyahang pagpanubay, nakita na lamang niini ang biktima nga nagkadugo na sa iyahang duyan. Gilayon kining nangayo og tabang aron madala sa ospital apan ang biktima gidklara nga dead on arrival tungod sa nahiaguman nga samad sa iyahang kalawasan.
Samtang dugang sa gihimong imbistigasyon sa kapulisan, usa ka wala hinganli nga nakakakita sa maong panghitabo nagbutyag nga adunay duha ka mga lalaki sumala pa ang nakamotor nga miduol sa nahimutangan sa biktima ug ang angkas niini ang mikanaog ug dayon mipusil sa biktima.
Sa gihimong pagresponde sa mga otoridad, narekober sa crimescene ang 12 ka mga basyo sa bala nga iya sa .9mm nga pistola. Sa pagkakaron ang mga otoridad nagpadayon pa sa ilahang pagpalawom sa imbistigasyon aron masuta ang motibo sa pagpamusil ug sutaon kung kinsa ang mga suspetsado.
