Nagpahigayon og panaghiusa ang mga lider sa tribo ning dakbayan sa Davao alang sa pagtukod sa United Moro Indigenous People Movement (UMIP) aron sumala pa ipalambo, mapreserba, ug mapausbaw ang kultura ug panulundon sa Moro ug Indigenous People (IP).
Gibutyag ni UMIP Chairperson Gabriel Nakan, nga daghan ang mga problema nga giatubang karon sa ilang komunidad, lakip na niini ang krisis sa edukasyon gumikan sa kakulangon sa budget allocation alang sa libre nga edukasyon nga ginahatag kaniadto sa National Commission on Indigenous Peoples (NCIP).
Kini nga kakulangon sumala pa nakapugong sa katungod sa mga batan-ong Indigenous ug Moro nga makatoun, ug nakapugong usab sa ilang kahigayonan sa pag-uswag sa kinabuhi.
Lakip sa uban pang problema nga giatubang niini mao ang kakulangon sa healthcare ug mga kabalaka bahin sa kalinaw ug seguridad.
Laraw karon sa UMIP nga magpahigayon og information drives sa nagkadaiyang komunidad sa siyudad aron ipalambo ug mapreserba ang tradisyon ug mga bili sa 11 ka ethnolinguistic groups.
Ang kalihokan usab nagapaningkamot sa maayo nga panggobyerno ug integridad sa piniliay, ug nanawagan sa Moro ug IP communities nga magpabilin nga malamboun sa kasayuran, mabinantayon, ug mipasiugda sa ilang katungod bahin sa electoral process.
Sumala pa ni Nakan, nga ang tumong lamang sa UMIP mao ang pagpalambo sa panaghiusa, pagpreserba sa pagkaila sa lumad, ug pagpanalipod sa mga katungod ug kayuhan sa ilang mga komunidad.
