Nakatala ang Davao City Health Office (CHO) og lima ka gidudahan nga kaso sa chikungunya ning dakbayan sa Davao.
Sumala pa ni Melodina Babante, labaw sa CHO’s Tropical Division, nga ang ilang buhatan kasamtangan nagamonitor sa lima ka mga gisuspetsahan nga kaso sa Chikungunya ning dakbayan.
Gibutyag usab niini nga ang ihap sa gisuspetsahan nga mga kaso nagkataas, ilabi na sa Barangay 9-A.
Dugang pa niini, nga ang Chikungunya dili makapatay, apan ang mga clinical signs ug symptoms niini susama sa sakit nga Dengue.
Dugang pa ni Babante nga naglusad na og daghang interbensiyon sa maong lugar ang buhatan aron nga mapakgang ang pagsaka sa ihap sa mga kaso sa Chikungunya.
Kini nga mga interbensiyon naglakip sa gipakusog nga “information dissemination” aron sa kaamgohan usab sa publiko bahin sa Chikungunya ug ang kaimportante sa pagpanglimpyo sa palibot ug nataran, lakip na ang pagpangita ug pagbungkag sa mga itloganan sa mga lamok aron nga mapugngan ang pagkatap sa maong sakit.
Gawas pa niini, nagpahigayon usab og “fogging” ang maong buhatan.
Gipaklaro usab sa opisyal nga bisan pa man sa mga paningkamot nga gihimo sa ilang buhatan ug sa barangay, usa sa mga hinungdan nga nakatampo sa pagtaas sa ihap sa kaso sa Chikungunya mao ang kakuwangon sa kooperasyon gikan sa komunidad.
Gidasig usab niini ang publiko nga mohimo og “proactive measures” sa pagpakgang sa pagkuyanap sa Chikungunya.
Kahinumdoman, atong miaging tuig 2024, ang buhatan nakatala og 12 ka kaso sa Chikungunya gikan sa nagkadaiyang mga barangay ning dakbayan.
Samtang, gikataho usab sa Department of Health (DOH) nga gikan sa Enero hangtud Marso 2024, ang nasud adunay 383 ka mga kaso sa Chikungunya, mas taas kini tandi sa 71 ka kaso atol sa susamang panahon kaniadtong 2023.
Ang World Health Organization (WHO) naghulagway sa Chikungunya isip kagaw nga mokuyanap sa mga tawo pinaagi sa paak sa “infected” nga lamok.
Pipila sa mga sintomas mao ang kalintura, pagpanakit ug paghubag sa mga kaso-kasohan, labad sa ulo, pagpanakit sa kaunoran, ug rashes.
Wala pay sumala pa kasamtangan nga tambal o bakuna alang sa maong kagaw.
