Gibutyag sa City Health Office (CHO) nga miubos og 37.3% ang mga natalang kaso sa dengue sa dakbayan gikan Enero 1 hangtod 15, 2025 kung itandi sa mga natalang kaso sa susamang mga adlaw sa tuig 2024.
Sumala pa ni Melodina Babante, Chief sa Tropical Division, City Health Office (CHO), nga gikan sa 225 cases nga natala sa unang duha ka semana sa 2024, miubos kini karon og 141 cases apan adunay usa ka patay nga natala ang buhatan rason sa pagpakusog sa ilang surveillance and monitoring, pagmugna og mosquito born task force and clean-up drive sa mga barangay, kalakip niini ang paghatag og libreng serbisyong medikal sa mga dabawenyo.
Pipila sa mga barangay nga ginakonsidera karong hotspot areas mao ang Bucana, Buhangin, Calinan, Sasa, Maa, Indangan, Catalunan Grande, Marilog, kalakip na ang Tibungco ug Talomo Proper.
Kahinumduman nga miabot og kinatibuk-ang 7,089 cases ug 55 deaths ang natala sa buhatan sa nakalabayng tuig hinungdan nga padayon ang pag-awhag karon sa opisyal ngadto sa publiko nga kanunay sundon ang 5-S kon Search and Destroy, Self Protection Measures, Seek Early Consultation, Support Fogging ug ang Sustain hydration, aron mapadayon pa ang pag-ubos sa mga kaso sa dengue ug dili mabutang sa risgo ang kinabuhi sa matag usa.
