Target sa Department of Agriculture (DA) nga makaani og 20.4 milyones metriko toneladang bugas karong tuiga, mas taas og 400,000 metriko tonelada tandi sa 2023.
Sumala pa ni DA Assistant Secretary for Special Concerns and for Official Development Assistance ug Spokesperson Arnel De Mesa, positibo ang ilang ahensya nga makab-ot ang maong target gumikan sa gipaabot nga mas nindot nga panahon sa nasud.
Dugang pa sa opisyal, nga mao kini ang ilang nagapadayon nga mga programa ug giplanohang mga kalihokan aron matabangan ang ilang departamento nga makab-ot ang target nga ani karong tuiga.
Sumala pa niini nga positibo usab ang panglantaw ni Agriculture Secretary Francisco Tiu Laurel Jr. nga moabot sa 20.4 milyones metriko toneladang bugas o humay nga nahibilin sa mga bodega sa National Food Authority (NFA).
Samtang, si De Mesa niingon nga ang budget nga ilang padayon nga gipang-apod-apod ngadto sa mga mag-uuma sakto na aron makaabot sa maong lebel sa ani karong tuiga.
Matod pa sa opisyal, nga mas taas ang budget nga gihatag sa mga lokal nga mag-uuma gikan sa National Rice Program aron mamintinar ang abunda nga ani sa nasud.
Dugang pa niini, nga sugdan usab karong tuiga ang pagpatuman sa giusab nga Rice Tarrification Law, diin ang budget allocation nga nadawat sa Rice Competitiveness Enhancement Fund (RCEF) ni-triple gikan sa P10 bilyones ngadto sa P30 bilyones ka pesos.
