Gikomperma sa Philippine Coast Guard (PCG) nga sa unang higayon migamit ang China og Long Range Acoustic Device (LRAD) aron harason ang mga barko sa Pilipinas sa West Philippine Sea (WPS).
Matod pa sa PCG, sagad mugamit ang China og water cannons ug mga delikadong mani-obra aron hadlukon ang mga nagsakay sa barko sa Pilipinas.
Gipahayag ni PCG spokesperson alang sa West Phil Sea Commodore Jay Tarriela, nga migamit matud pa ang China ug LRAD nga usa ka specialized loudspeaker nga mupagawas og kusog nga tingog nga mamahimong hinungdan sa pagkadaot sa eardrums, lakip na usab ang permanenting pagkahanaw sa pangdungog.
Partikular nga gihisgutan ni Tarriela ang China Coast Guard vessel nga adunay hull number 3103 ang migamit sa LRAD aron harason ang BRP Cabra aron pugngan ang pagduol niini.
Dugang pa sa opisyal, gipulihan sa CCG 3103 ang CCG 3304 aron iligal nga magpatrolya sa kabahin sa exclusive economic zone sa Pilipinas.
Apan bisan paman sa pagpang-harass sa China Coast Guard, wala nagpatandog ang BRP Cabra sa Philippine Coast Guard.
Nagpadayon sa pagpatrolya ang BRP Cabra aron mapugngan ang pagsulod sa China sa kabaybayunan sa Zambales.
Padayon usab ang paghatag og radio challenge sa PCG sa CCG ug gikanayon nga ang ilahang presensya ang nakasupak sa Philippine Maritime Zones Act, ug United Nations Convention on the Law of the Sea (UNCLOS).
