Nanawagan ang South Korea nga mubiya na ang mga tropa sa North Korea nga matod pa naka-deploy sa Russia ug gigamit sa giyera sa Russia batok Ukraine.
Matod pa sa National Intelligence Service, ang spy agency sa South Korea, nakumperma niini nga nagpadala ang North Korea ug mukabat sa 1,500 special operation forces sa Russia.
Ang nahisgutang mga sundalo ang mutabang sa Russia sa nagpadayon niining giyera sa Ukraine.
Gipatawag na usab sa SoKor government ang Russian Ambassador nga nakabasi sa Seoul, aron iprotesta ang gihimo sa NoKor.
Sa pag-atubang ni South Korean Foreign Minister Kim Hong Kyun ug Russian Ambassador Georgy Zinoviev, gikundena ni Kim ang gihimo sa NoKor nga matod pa mihatag ug hulga sa South Korea ug sa international community.
Dugang pa ni Kim, himuon sa iyahang nasud ang tanang makaya isip tubag sa gihimong aksyon sa North Korea nga matod pa hulga sa national security ug national interest sa South Korea.
Una niini, gipahayag ni Ukrainian President Volodymyr Zelenskyy nga nasayran na sa mga intel officer sa Ukraine ang matod pa mukabat sa 10,000 ka mga North Korean soldiers nga andam kunong musalmot sa Russian forces nga padayong nakig-giyera sa Ukraine.
