Gisugdan na sa Criminal Investigation and Detection Group (CIDG) ang pagpakisayod sa mga pulis nga nalambigit sa maduguong war on drugs sa administrasyong Duterte.
Gipahayag ni PNP Public Information Office chief Police Brig. General Jean Fajardo, nag-imbestiga na ang CIDG aron masayran kung si kinsang mga pulis sa PNPA Class 1996 ug 1997 ang nahilakip sa war on drugs.
Unang gipahayag ni former PCSO General Manager Royina Garma sa House Quad Committee hearing nga adunay mga miyembro sa PNPA Class 1996 ug 1997 ang gipatawag ni kanhi Pangulong Rodrigo Duterte aron himuon ang Davao Model Drug War sa tibuok nasud.
Samtang bisan paman sa PNPA Class 1996, gipahayag ni Fajardo nga wala kini na-imbitahan ni Pangulong Duterte alang sa war on drugs project.
Gipaneguro usab ni Fajardo nga walay tabunan ang PNP bisan ang mga hataas nga opisyal nga madeskubrehang nalambigit kuno sa reward system ug sa EJK.
Samtang kung kahinumduman, nanawagan si PNP chief General Rommel Francisco Marbil sa mga kanhi pangulo sa PNP nga mupasabot sa ilahang papel sa war on drugs sa administrasyong Duterte homan sa pamahayag ni Garma nga nasayod ang mga kanhi PNP chiefs ug mga regional director sa reward system ug EJK.
Samtang gipahayag usab ni Fajardo nga posibleng usa ka grupo lamang ang nagpaluyo sa pagpatay kang kanhi PCSO Board Secretary Wesley Barayuga ug Tanauan, Batangas Mayor Antonio Halili.
Dugang pa ni Fajardo, dili angay magamit ug nalambigit ang mga pulis sa personal nga interes sa mga pulitiko. Migawas usab sa pagdungog nga wala sa orihinal nga listahan sa narcolist si Barayuga, apan nabutang ang pangalan niini sa narcolist homan kini ang napatay.
