DAVAO CITY – Sikop ang sa usa ka lalaki tungod sa pagpanag-iya og armas, nahitabo kini human siya gi-report sa kapulisan tungod sa paghimo og kasamok sa usa ka tindahan sa Purok 48, Sitio Malamboon, Barangay Malabog, dakbayan sa Davao, pasado alas 8 sa kagabi-i.
Sa pagsusi sa mga sakop sa Paquibato Police Station sa lugar, si alyas Joblin boluntaryo nga misurender sa dihang niabot ang mga otoridad.
Atol sa pagrekisa sa otoridad, nakuha gikan sa suspetsado ang usa ka .9mm caliber pistol, usa ka magazine, lima ka mga bala, ug usa ka basiyo sa bala.
Sa dihang gipangayuan og papeles ang nahisgutan walay mapakita ngadto sa otoridad.
Ang suspetsado ug ang mga gikumpiskang ebidensya ang gidala sa estasyon sa kapulisan aron nga bilangguon.
Wala usab gikabutyag sa otoridad og unsay hinungdan sa paghuramentado sa suspek sa usa ka tindahan.
Samtang, pasakahan kini og kasong pagsupak sa RA 10591 kon paghupot og armas nga walay dokumento ingon man ang alarm and scandal gumikan sa pagmaoy niini.
