Nahimong hisgutanan sa East Africa ang tribong Mundari nga gikan sa South Sudan nga naila nga “Cow Tribe” gumikan sa dakong kabahin sa ilahang kinabuhi ang mga baka ilabi na sa ilahang panginabuhian.
Nasayran nga nagpuyo ang mga nahisgutang tribu sa liboan ka mga baka nga kini ang dakong kabahin sa inadlaw-adlaw nga panginahanglanon.
Apan gawas sa pagkaon, mas labing mahinungdanon sa nasampit nga tribu ang ilahang binuhing baka ang ihi niini isip pang-shower kon pangligo.
Gawas sa ihi, ginagamit nila ang hugaw sa baka isip panglimpyo ug sunscreen.
Sunugon nila ang mga hugaw ug ipahid ang abo niini sa ilang lawas.
Ginagamit usab sa mga Mundari ang ihi sa baka isip panghugas sa ilang nawong, kamot ug ingon man sa ilang mga ngipon tungod kay nagtoo sila nga antiseptic kini o panglimpyo.
Makatabang usab ang uric acid nga makaplagan sa ihi nga muhatag kanila og kolor pula, orange o yellow nga buhok nga alang kanila nindot tan-awon.
Tungod sa kadako sa tabang nga nahatag sa baka sa ilaha, nagbaton pa sila ug pusil aron nga pagpanalipod sa mga baka batok sa mga kawatan.
Sama sa daghang tribo sa rehiyon, simbolo sa bahandi ug gahum ang mga baka alang sa mga Mundari ug andam nila kining pakamatyan.
