DAVAO CITY- Mokabat sa 71 ka mga panimalay ang ugdaw atol sa nahitabong sunog sa Purok 6-A ug Purok 6-B, Brgy. 5-A Bangkerohan ning dakbayan sa Davao pasado alas otso ang takna kaganihang buntag.
Subay sa report sa mga otoridad nagsugod sumala pa ang pag-ulbo sa kalayo sa panimalay nila Alameda Jutoy ug Annabel Cadollo.
Dali nga narespondehan ang nasampit nga sunog apan paspas nga gilamoy sa kalayo ang nasampit nga mga panimalay sanglit kasagaran gama sa mga light materials.
Nakontrola ang sunog pasado na sa alas nuybi sa buntag nga sa pagkakaron padayon pa ang ginalusad nga imbistigasyon sa hinungdan sa pag-ulbo sa kalayo ingon man ang kinatibuk-an nga danyos.
Sa pagkakaron subay sa inisyal nga report sa otoridad, adunay 71 ka mga tag-iya sa panimalay, 40 ang sharer, ug 32 ang renter.
Samtang adunay 150 ka mga pamilya ang apektado kon 452 ka mga indibidwal nga karon anaa kini temporaryo nga nagpundo sa Bangkerohan Gym.
Sa kinatibuk-an adunay 60 ka mga balay ang totally damage samtang onsi ang partially damage. Atol sa maong panghitabo, walay natalang naangol ug nakabsan sa kinabuhi.
