DAVAO CITY- Gitawag karon nga “immature” kon binata ang lakang nga ginahimo sa gobyerno kalabot sa pagbutang og daghanang presensya sa mga kapulisan gawas sa Kingdom of Jesus Christ Compound, Buhangin, ning dakbayan.
Atol sa gipahigayong Maisug Prayer Rally sa Cagayan de Oro kagahapon, gikanayon sa mayor nga mas daghanang problema karon nga gina-atubang ang rehiyon kon diin mas labing nanginahanglan og pagtagad sa mga otoridad ug gobyerno.
Nahimong pananglitan sa mayor ang pagdeklara niini og war on drugs sa dakbayan diin makonsiderang labing seryoso nga problema kon itandi sa pagpokus na lamang og maayo sa mga akusasyon batok kay Pastor Apollo Quiboloy.
Dugang pa ni Baste nga kung boot huna-hunaon, wala nakaapekto sa daghanang dabawenyo ang mga akusasyon sa pastor.
Kabahin niini, gitawag pa nga “hilarious” kon kataw-anan sa mayor ang ginabuhat nga pagpahimulos sa katungdanan kon grave abuse of authority sa mga opisyal sa gobyerno kung diin ginahimo na lamang matud pa nga playground ang dagan sa nasud base sa gusto niining mahimo o mahitabo bisan paman wala na kini nahisubay sa balaod.
Kahinumduman nga nahimong dakong hisgutanan ang matud pa dili makatarunganong pagserve og warrant of arrest batok kay Pastor Quiboloy kaniadtong bulan sa Hunyo.
Daan na usab gikabutyag sa PRO XI nga nagasunod lamang sila sa balaod uban sa panghangyo nga kumbinsihon ang pastor sa pagpakita na sa mga otoridad.
