DAVAO REGION- Giawhag karon ang mga Local Government Unit sa rehiyon sa Mines and Geosciences Bureau XI nga magmugna ug ordinansa aron nga modeklara ug “No Build Zones” sa mga delikadong lugar.
Tumong sa maong panawagan ang pagkunhod ug paglikay sa kadaot nga hatod sa mga kalamidad ilabi pa sa kinabuhi sa mga residente sa mga maapektuhang lugar.
Subay sa pamahayag ni MGB XI Geosciences Division chief Herbert Villano, adunay pipila lamang ka mga LGU’s dinhi sa rehiyon ang nagpatuman og mga ordinansa human sa ilang gihimong rekomendasyon.
Samtang gipaambit niini ang pag-apud-apud sa ilahang buhatan sa mga updated nga mga Geohazard Mapping alang sa flood and rain-induced landslide areas niadtong Mayo sa mga nagkadaiyang LGUs.
Tungod niini nanghinaot ang opisyal nga sundon sa mga ubang LGUs ang mapping sa MGB diin mahimo kini isip giya sa pagdeklarar sa mga lugar isip “No Build Zone” ilabi na niadtong mga lugar nga delikado kaayo sa baha ug pagdahili sa yuta.
Kini ang padayon nga pahimangno karon sa nasampit nga ahensya gumikan sa sagunson nga mga pag-ulan dinhi sa nagkadaiyang bahin sa rehiyon ilabi na nga karong panahona gideklara nga ting-ulan.
Samtang dinhi sa rehiyon, una ng giila nga delikado puy-an sa mga katawhan ang Brgy.Masara sa Maco Davao De Oro ug kini ang gipailawom na sa “No Build Zone” nga kini usab ang hugot nga gimonitor karong panahuna sa LGU.
