DAVAO CITY- Patong-patong nga kaso ang atubangon sa dinakpan tungod sa dul-an usa ka milyon nga iligal nga droga ang nakumpiska ug armas atol sa gikasa nga drug buybust operation kaganihang kaadlawon sa mga operatiba sa Ecoland PNP.
Subay sa report sa mga otoridad, gilusad ang operasyon kaganihang ala-una ang takna sa kaadlawon nga miresulta sa pagkasikop kang alyas ‘Jay-Ar’ 35-anyos, minyo ug residente dinhi sa dakbayan.
Sumala pa sa kapulisan nga pipila usab ka adlaw nila kining gimonitor ang suspek diin idlas sumala pa armado.
Dako sumala pa ang pasalamat sa Kapulisan sa Ecoland sa mga nagpakabana ug nakipagtambayayong nga mga impormante aron nga mahimong malampuson ang pagkasikop sa suspetsado.
Narekober kang alyas Jay-Ar ang pipila ka mga pakete sa iligal nga droga kon shabu nga mitimbang ug kapin 100 gramos nga adunay kinatibuk-an nga kantidad nga mokabat sa Php 727, 025.00.
Gawas niini, nakarekober usab sa operatiba ang mga pinauga nga dahon sa marijuana gikan sa suspetsado.
Mag-atubang karon ug duha kaso si alyas Jay-Ar sa paglapas sa RA 9165 kon Comprehensive Dangerous Drugs Act of 2002 ug RA 10591 kon kalambigitan sa paghupot ug armas nga walay igong papeles.
