Gikakurat sa mga supporters ni US President Joe Biden ang pag-withdraw niini sa pagdagan isip pangulo.
Matud pa sa mga democrats, wala sila nagdahom sa gihimong desisyon ni Biden hilabi pa nga daghanan ang nagsuporta kaniya.
Apan bisan paman sa maong desisyon, gikalipay gihapon sa mga supporters niini ang pag-endorso kay Vice President Kamala Harris.
Sumala pa ni Peter Jabido, Bombo International News Correspondent sa USA nga nasabtan nila ang pressure nga nabatian ni Biden hilabi pa nag kaniadtong nakalabay nga debate, gipunting ni Trump ang iyang edad nga sumala pa dakong babag sa iyang pagdumala.
Pagpaklaro pa ni Peter nga dako og tyansa nga madaog si Kamala Harris gumikan na usab sa maayo niining background.
Gawas sa pagka bise-presidente, dugay na matud pang naila ang nahisgutan isip usa sa mga top lawyers sa nasud ug daghanan na usab kini og mga kasinatian sa paghatag og tabang sa biktima og pagpangabuso.
Apan bisan paman niini, gikabutyag ni Peter nga aduna pay pipila ka bulan ang molabay rason nga dili pa matagna kung kinsa ba ang mamahimong presidente sa nasud.
Malaumon usab ang nahisgutan nga dili na makabalik pa ang republicans nga sagad nagahatag lang og pokus sa immigration kung itandi sa democrats nga ginatagaan og pagtagad ang peace and order, immigration, ug ekonomiya.
Ning kasamtangan, init gihapon ang eleksyon sa US hilabi pa sa bag-ohay lamang nga assassination attempt kay kanhi US President Donald Trump.
