Gitagna na ni Davao City Mayor Sebastian “Baste” Duterte ang pabalik-balik na lamang nga hisgutanan sa West Philippine Sea atol sa State of the Nation Address ni Pangulong Ferdinand “Bongbong” Marcos, ugmang adlawa.
Kini ang gikabutyag sa mayor atol sa People’s Sona: Hakbang ng Maisug Rally nga gipahigayon sa Liwasang Bonifacio, Manila kagahapong adlawa.
Sigon pa ni Baste, walay tarong nga plataporma ang pangulo sa pagtubag sa mga domestic issues rason nga ginabalhin na lamang niini ang atensyon sa gina-ilugang kadagatan aron matabunan ang mga nag-unang problema sa Pilipinas. Sumala sa mayor, puros lamang kaisog sa istorya ang nabuhat sa mga opisyal, apan kadtong aduna nay insidenteng naputlan sa tudlo ang usa ka sundalo, gikabutyag na usab ang pakig-negotiate sa China.
Pagpaklaro pa ni Baste, dili gayud ikalimod ang mga naimpluwensya sa China sa atoang nasud susama na lamang sa mga kagamitan nga sagad ginama sa China.
Gipunting ni Baste ang kamatuoran nga dili gayud tubag ang pag promotar sa Synophobia o ang paghatag og kasuko ug discrimination sa mga tsino aron matubag ang bangi sa West Philippine Sea.
Matud pa sa mayor, mas labing maayo ang pagpatigbabaw sa kalinaw inay sayangon ang atong kaisog sa pagsukol sa China hilabi pa nga wala gayud kitay igong kapasidad.
Sumala ni Baste, gikinahanglan karon ang maayong aksyon kung asa walay panagbangi apan mapasabot gihapon ang atong katungod sa nahisgutang kadagatan.
