DAVAO CITY- Gikwestyun karon sa Kingdom of Jesus Christ (KOJC) ang paghatag og dakong pagtagad sa pipila ka media outlets alang sa mga akusado nga sila kanhi Bayan Muna Rep. Satur Ocampo ug kasamtangan Alliance of Concerned Teachers Rep. France Castro.
Sumala pa ni Carlo Catiil, ministro sa KOJC nga imbes tagaan og dakong pagtagad ang mga nabiktima sa mga nahisgutan mas gitagaan hinoon sa mga media outlets og tyansa nga ipaglaban ang katungod ni Castro ug Ocampo.
Matud pa nga mas maayong madungog ang mga gipangbati ug kasinatian sa mga biktima, hilabi pa nga maayong kahigayonan kini aron mapakita gayud sa mga Pilipino ang dili maayong binuhatan sa duha ug aron usab maduot ang mga operatiba sa CPP-NPA-NDF.
Kahinumduman nga subay sa bag-ohay nga desisyon sa korte, gikonbikto sila kanhi Bayan Muna Representative Satur Ocampo ug ACT-Teachers Representative France Castro, uban sa onse niining kaubanan pa sa kalapasan sa RA 7610 kon Special Protection of Children Against Abuse, Exploitation, and Discrimination Act tungod sa giingong pagkalambigit sa mga nahisgutan sa 2018 evacuation sa mga batang IPs gikan sa Talaingod, Davao Del Norte.
Alayon niini, nahimong pananglitan sa ministro ang gihimong pagbali sa pipila ka mga media outlets sa tinood nga nahitabo atol sa pagserve og warrant kay Pastor Apollo Quiboloy.
Sigon ni Catiil, nahimong bias matud pa ang media hilabi pa sa pagpaguwa og tinood nga nahitabo atol sa maong insidente.
Naadan na matud pa nga kung galing ibalita ang pangalan ni Pastor Apollo Quiboloy, puro na lamang negatibo ang unod sa maong mga balita.
Ning kasamtangan, gipasalig sa grupo nga magpadayon ang ilang paningkamot sa paglaban sa ilang katungod hilabi pa sa mga maayong binuhatan ni Pastor Apollo Quiboloy.
