Gibuwag sa mga operatiba sa Philippine Drug Enforcement Agency Regional Office XI (PDEA RO11) ang usa ka giingong drug den atol sa buy-bust operation sa Purok Manga, Barangay Macangao, Lupon, Davao Oriental, mga alas 10:00 sa gabii niadtong Hulyo 9, 2026.
Nadakpan sa operasyon ang giingong drug den maintainer nga giila lamang sa alyas “Naldo,” 49 anyos, human giingong nakabaligya og usa ka sachet sa gituohang shabu nga nagkantidad og ₱1,000 ngadto sa poseur-buyer sa PDEA. Nadakpan usab ang giingong drug den employee nga giila sa alyas “Jol,” ug ang giingong drug den visitor nga giila sa alyas “Cathy.”
Nasakmit sa mga operatiba ang duha ka sachet sa gituohang shabu nga adunay kinatibuk-ang gibug-aton nga 11 gramos ug gibanabanaang kantidad nga ₱74,800, tulo ka sachet ug usa ka hugpong sa gituohang dried marijuana leaves nga adunay kinatibuk-ang gibug-aton nga 50 gramos ug kantidad nga ₱6,000, lain-laing drug paraphernalia, ug ang gimarkahang buy-bust money. Ang tulo ka nadakpan atubangon ang kasong paglapas sa Republic Act No. 9165 o Comprehensive Dangerous Drugs Act of 2002, nga giusab.
