Sikop sa mga operatiba sa Criminal Investigation and Detection Group (CIDG) ang usa ka babaye nga giingong nagpakaaron-ingnong empleyado sa Pag-IBIG Fund ug nakapangilad og kapin P1 milyon pinaagi sa usa ka giingong housing scam sa Davao City.
Giila sa kapulisan ang suspek pinaagi sa alyas nga “Lyz,” 34 anyos, residente sa Bangkal, Talomo, Davao City. Nadakpan kini sulod mismo sa opisina sa Pag-IBIG Fund sa Pryce Tower, Bajada atol sa hiniusang operasyon sa CIDG ug mga opisyal sa Pag-IBIG.Base sa imbestigasyon, sukad pa niadtong Abril 2026, gapaila na ang suspek nga awtorisadong ahente sa Pag-IBIG ug nagtanyag og mga foreclosed properties aron mapadali kuno ang pagpalit niini.
Tungod niini, nakabayad ang biktima og P1 milyon alang sa 18 ka giingong housing units sa nagkalainlaing subdivision sa Davao City.Nasuta sa Pag-IBIG nga peke ang muga dokumentong gigamit sa suspek ug wala kini koneksyon sa maong ahensya. Giingong nangayo pa kini og dugang P120,000 gikan sa biktima sa dili pa madakpan sa entrapment operation.
Nag-atubang karon ang suspek og mga kasong estafa, usurpation of authority, ug paglapas sa Anti-Red Tape Act. Samtang, giaghat sa CIDG ang publiko nga siguruhong lehitimo ang mga ahente ug dokumento sa dili pa motugyan og kuwarta sa bisan unsang transaksyon.
