Giklaro ni PLtCol. Christian Garcia, Chief sa Davao City Police Office-Traffic Enforcement Unit (DCPO-TEU), nga makapadayon og pamasada ang viral nga public utility jeepney (PUJ) driver nga si Marcial Morante bisan pa sa iyang naisyung traffic violation.
Gikatahon dili overspeeding ang nahimong paglapas ni Morante kondili swerving, ug human mahatagan og traffic citation ticket, gibalik usab dayon ang iyang lisensya aron makapadayon sa pamasada. Gipasabot ni Garcia nga dili criminal case ang giatubang ni Morante kondili usa lamang ka traffic violation nga misikat sa social media hinungdan nga misamot ang pagdako sa isyu.
Gipahimangnoan ni Garcia ang mga drayber ug commuter nga kanunay tumanon ang balaod trapiko, magmatngon sa dalan, likayan ang pagdali aron malikayan ang aksidente, ug kung galing adunay mga reklamo mahitungod sa kalapasan sa mga drayber kinahaglang mudangop sa mga awtoridad ug dili dayun mag post alang lang views kay masulbad ra kini sa propesyonal ug legal nga pamaagi.
Nangayo usab og pasaylo si Jennifer Empresa, ang babaye nga nag-upload sa viral nga video batok sa PUJ driver, human sa kontrobersiya nga misunod sa iyang post.Gipasabot sa complainant nga nadala lamang siya sa kahadlok tungod sa iyang nasinati sulod sa jeep ug sa iyang pagtuo nga delikado ang pagmaneho sa drayber. Giangkon niya nga nasayop siya sa paagi sa iyang pag-post sa video, ilabi na kay naapektuhan ang menor de edad nga anak sa drayber, lakip na usab iyang kaugalingong pamilya. Nangayo siya og pasaylo kang Morante, sa iyang pamilya, ug sa publiko, samtang nanghinaut nga masabtan usab ang iyang bahin sa maong insidente.
Gibarugan hinuon ni Jennifer nga dili gihapon luwas ang pag-swerve sa drayber, apan giila niya nga sayop ang paagi sa pagpahibalo sa reklamo pinaagi sa social media. Andam usab siyang makigtambayayong sa Land Transportation Franchising and Regulatory Board (LTFRB) ug makigkita kang Morante aron masulbad ang isyu.
Dugang pa nga nakasinati siya og grabeng pagbatikos gikan sa mga netizen ug nakadawat pa gani og mga mensahe nga naghulga sa iyang kinabuhi ug sa iyang pamilya, lakip ang dili maayong komento batok sa iyang mga anak. Gipasalamatan niya ang ubang pasahero sa PUJ nga misuporta sa iyang reklamo pinaagi sa pag-adto sa LTFRB aron mopamatuod sa ilang nasinati atol sa biyahe.
