Gi-aprubahan sa Gabinete ang gisugyot nga 2027 National Expenditure Program (NEP) atol sa Cabinet meeting nga gipangulohan ni Pangulong Ferdinand Marcos Jr. karong Biyernes sa Malacañang.
Sumala kang Presidential Communications Office (PCO) Secretary Dave Gomez, gihisgutan ug giaprubahan sa maong panagtigom ang gisugyot nga nasudnong badyet alang sa fiscal year 2027, subay sa rekomendasyon sa Department of Budget and Management (DBM)
Matod pa ni Gomez, wala pa sa pagkakaron gipadayag ang kinatibuk-ang kantidad ug uban pang detalye sa maong budget proposal aron dili kini maunhan sa pormal nga pagsumite ni Pangulong Marcos ngadto sa Kongreso. Dugang pa niini, wala usab maghatag si Gomez og dugang kasayuran sa ubang mga isyung gihisgutan atol sa Cabinet meeting nga gipahigayon sa Malacañang.
Kahinumduman nga gitakdang ipasa ni Pangulong Marcos ang 2027 National Expenditure Program ngadto sa Kongreso sa Agosto 14, 2026, duha ka semana human sa iyang State of the Nation Address (SONA) nga ipahigayon sa Hulyo 27.
Lakip sa gigamit nga basihan sa pagplano sa umaabot nga badyet ang kasamtangang P6.793 trilyon nga national budget alang sa fiscal year 2026.
Matod pa, mas taas kini og kapin P467 bilyon, o 7.4 porsyento, kumpara sa P6.326 trilyon nga nasudnong badyet nga gipatuman niadtong 2025.
Sa kasamtangan, gipaabot nga mas maila ang prayoridad nga mga programa ug alokasyon sa pondo sa kagamhanan sa higayon nga pormal nang isumite sa Malacañang ang 2027 National Expenditure Program ngadto sa Kongreso alang sa ilang paghisgot ug pag-apruba.
