DAVAO CITY- Gikumpirma sa NBI XI nga na-relieve na sa pwesto ang in-charge sa municipal civil registration nga nalambigit sa pagpameke og birth certificates sa Davao del Sur.
Sumala pa ni Atty. Arcelito Albao, chief sa NBI XI, kini subay na usab sa mandato ug gahom ni Sta Cruz Mayor Jose Nelson “Tata” Sala isip lakang aron mapalawman pa ang ginalusad nga imbestigasyon.
Alayon niini, ginasubay na karon sa NBI XI ang kamatuoran sa gikaingong mga pekeng nga mga Birth Certificate nga gibayaran ug P300,000 ngadto na sa P500,000 sa fixers.
Dugang pa ni Albao nga posibleng aduna gayuy mga sindikato nga nagapaluyo niini nga gikan sa Luzon Area hilabi pa nga nag-issue na og certification ang Brgy. Officials sa walay mga pangalan nga narehistro sa ilang buhaan gikan sa mga danakpan.
Dako matud pa ang posibilidad nga aduna kini kalambigitan sa POGO nga usa sa mga dagkong issue nga ginasulbad sa atong nasud ning panahona.
Una nang gikabutyag sa opisyal nga gikan tuig 2016 hangtod sa 2021 miabot na sa 1200 ang ihap sa mga nakumpiskang birth certificates sa ilang buhaan kung diin adunay peke nga impormasyon.
Alayon niini nagpaabot na og suporta ang Sta Cruz LGU aron sa pagpangita og kasulbaran sa maong problema.
